''დაგვერხა თან ძაან მაგრად'' - გიორგი ფხაკაძე სოციალურ ქსელში ამაღელვებელ სტატუსს აქვეყნებს


„თავის მოტყუება რატომ გვიყვარს, მართლა ვერ გავიგე, არაფერი არ გვაქვს რომ შევაჩეროთ ეპიდემია ქვეყანაში“,- ეს განცხადება, გაეროს გენერალური მდივნის მრჩეველმა, გიორგი ფხაკაძემ სოციალურ ქსელში გააკეთა.

გიორგი ფხაკაძე, ერთ-ერთ სტატიასაც გააზიარა, რომელშიც ჩეხეთში არსებულ მძიმე ეპიდემიოლოგიურ სიტუაციაზეა საუბარი.

სტატიიდან ვიგებთ, რომ ჩეხეთში დაგვიანებული მოქმედებებისა და არასწორად გადადგმული ნაბიჯის გამო მძიმე მდგომარეობაა და საავადმყოფოები ჩამოშლის პირასაა.

სტატიაში ჩეხეთის ერთ-ერთი მთავარი ეპიდემიოლოგი მიუთითებს სამ გადაწყვეტილებაზე, რომლებმაც ქვეყანაში მსგავსი სიტუაცია გამოიწვია.

„პირველი შეცდომა არის ის, როდესაც მთავრობამ უარი თქვა ზაფხულში პირბადის სავალდებულო ტარებაზე, მეორე, როდესაც გადაწყვიტა შობის წინ მაღაზიების გახსნა და მესამე, როდესაც მთავრობამ ვერ მოახერხა რეაგირება იანვრის დასაწყისში ვირუსის ახალ ვარიანტზე. ეს სამი დიდი შეცდომა იყო და ახლა, ჩვენ მხოლოდ ვლოცულობთ, რომ მეოთხე არ მოხდეს”, – აცხადებს ეპიდემიოლოგი.

„აგერ ბატონო, ფხაკაძე გაფრთხილებთ მაგრამ ვინ გისმენს, მაგინებთ, მლანძღავთ, 1000 სისულელეს წერთ ჩემს წინააღმდეგ. ჩემი თუ არ გჯერათ ნახეთ თუ რა ხდება ჩეხეთში. თავის მოტყუება რატომ გვიყვარს, მართლა ვერ გავიგე.

დავიღალე ოღონდ მართლა. არაფერი არ გვაქვს რომ შევაჩეროთ ეპიდემია ქვეყანაში. ტყუილი, კორუფცია, არა პროფესიონალიზმი, ნეპოტიზმი, გაუნათლებლობა, ექსტრემიზმი, ფარისებლური მორწმუნეობა და ყველაფერი შეფუთვა პოლიტიკურ ფერში, დავიღალე.

PS: დაგვერხა თან ძაან მაგრად“,- წერს გიორგი ფხაკაძე სოციალურ ქსელში.